Pechar

• O Cabo de Udra está situado no extremo noroccidental da parroquia de Beluso, linda coas praias de Mourisca e Ancoradouro.

• Ten un grande interese xeolóxico pola existencia duns conxuntos pétreos con curiosas formas de beleza singular. Neles podemos observar cacholas, pías, acanaladuras e outras formas características da paisaxe granítica, sendo salientables os grandes cristais de feldespato de ata 15 cm. de longo.
Tamén é de destacar a existencia, hoxe moi deteriorada, dunha duna fósil, fenómeno moi pouco abundante na nosa zona.

• Os primeiros vestixios humanos en Udra,  ademais duns dubidosos refuxios neolíticos, son os restos cerámicos procedentes dun antigo castro e hoxe depositados no Museo Massó.

• Nas augas do Cabo apareceron unhas áncoras de navíos romanos, expostas no Museo de Pontevedra, que falan ás claras do tránsito mariño.

• Moito despois temos o testemuño duns refuxios gandeiros. Estas edificacións aproveitan os rochedos naturais que son logo pechados con pedras.

• Dende 1936  ata 1984 foi un campamento militar para a defensa da ría.

• Na actualidade forma parte da rede Natura 2000 e a súa beleza foi cantada por destacados autores.