Pechar

• No 1686 Fernando de la Rúa i Freire, cura párroco de San Martiño de Bueu, funda esta capela no alto do Balado. A capela orixinaria derrubouse e a abundante representación pétrea espallouse por distintas casas da Vila. Conservouse da capela só unha forneliña coa imaxe do rei Baltasar, o que mantivo viva a devoción.
No 1948 o Concello acorda construír unha nova capela e encarga a Urbano Lugrís o deseño e a Victoriano Barcala a construción da mesma. Os bocexos desta capela pódense contemplar actualmente na Casa do Concello de Bueu.

• A capela, inaugurada o 4 de outubro de 1953, é unha pequena construción de planta rectangular (5 x 6 m. aprox.), con cuberta a catro augas.
Na fachada presenta un arco de medio punto apoiado en basamenta de cadeirado que sobresae da liña de fachada facendo un pórtico. Coroa o arco unha especie de crismón cunha cruz aspada. Está decorado con motivos mariñeiros: un barco de vela, áncora de almirante, peixe, cuncha de vieira, gaivota, rosa dos ventos e balea, moi característicos do estilo de Lugrís.

• A ámbolos dous lados da porta hai dous contrafortes impostos cunhas fornelas, que no seu día albergaban as imaxes de San Xosé e da Virxe. No ano 2005 colocarónse dúas novas imaxes en substitucións das orixinais perdidas.
Nos laterais tamén existen catro falsos contrafortes, columnas pétreas con cadanseu evanxelista que ornamentan a capela (hoxe só quedan tres).

Os modillóns que simulan o soporte do saínte están decorados con cunchas de vieira.
En cada fachada lateral existe unha fiestra en arco de medio punto e decorada, cunha roda de temón a sur e unha áncora a norte.
A fachada posterior está rematada por unha espadana en arco.

• Nos anos 70 comezou a derrubarse o tellado e desapareceron algunhas das figuras ornamentais e mesmo un retablo de tres corpos, tallado polos irmáns Ribas de Santiago con tres cadros e deseño de Lugrís.