Pechar

• É un centro cultural de obrigada visita pois está considerado un dos mellores museos mariñeiros do mundo.

• Seguindo a moda de moitos promotores cataláns a comezos do XIX, a familia Massó chega a Bueu, onde se asentaron como salgadores, no 1816.
No ano 1928, o premio Nobel e inventor da radio, Guillermo Marconi, de visita na, entón, modernísima fábrica conserveira, queda sorprendido pola colección de libros antigos, instrumentos náuticos, cartas mariñas, mapas e diversa maquinaria do inicio da conserva esterilizada que posúen os Massó e anímaos a que creen un museo. No 1932 volverá como convidado á inauguración.
O museo foise enriquecendo con fondos bibliográficos sobre todo a partir de 1939 por iniciativa de José María e Gaspar Massó.
No ano 1993 a Xunta de Galicia mércao e despois dunhas reformas no edificio ábrese ao público o 10 de xullo de 2002.

• Consta de catro salas. Na planta baixa podemos observar a dedicada á carpintería de ribeira, materiais e maquinaria para a fabricación dos envases de conservas, embarcacións tradicionais, etc. Anexa a ela outra con distintas artes de pesca tradicionais, útiles para atar as redes e sobre todo un apartado sobre a caza da balea que vai dende primitivos arpóns ata un moderno canón pasando por botas ou instrumentos de despece. Na terceira sala da planta baixa atópanse varias mariñas do pintor Urbano Lugrís, instrumentos prehistóricos e cunchas mariñas. Na planta alta está a sala nobre cunha grande e valiosa colección de libros entre os que figuran varios incunables e os primeiros libros europeos sobre a arte da navegación; gravados e documentos coma os referidos á expedición do navegante Malaespina, cartas autógrafas de Filipe II ou títulos de venda de escravos; así mesmo marabillosas maquetas e distintos instrumentos náuticos.

• Na fachada exterior aparece labrado en pedra o anagrama MASSÓ e a escultura en relevo de dúas carabelas.